अंतर

दूर आहेस माझ्यापासून खूप

जगाच्या मागण्यांच्या विळख्यात.

तरी तुझा आवाज कसा पोचतो आहे माझ्यापर्यंत?

आणि माझा आवाज ऐकून खुशालतो कसा आहे तुझा चेहरा?

कशा निवळून जाताहेत कपाळावरच्या आठ्या क्षणार्धात?

कुठले धागे आहेत हे अदृश्याचे आपल्याला जोडून घेणारे,

ज्यांतून हलके, अगदी हलकेसे कंपही, अलगद पोचताहेत या हृदयीचे त्या हृदयी?

हा कुठला काळानिळा पक्षी रात्रीच्या अंधारात मिसळून गातो आहे आपल्या दोघांसाठीच फक्त,

त्याचं कोवळंशार गाणं?

दूर तरी आहेस का तू खराच माझ्यापासून?